Handknattleiksdeild KA hefur borist góður liðsstyrkur en Ingvar Heiðmann Birgisson hefur gengið í raðir KA-liðsins á nýjan leik og leikur með liðinu í Olísdeildinni á komandi vetri. Ingvar sem er þrítugur að aldri er öflugur varnarmaður en er einnig línumaður, segir í tilkynningu KA í dag.
Ingvar hóf handboltaferil sinn með yngri flokkum KA en hann er frá Gullbrekku í Eyjafirði. Hann kom í kjölfarið inn í sameiginlegt lið Akureyrar en þaðan gekk hann í raðir ÍR er hann flutti suður tvítugur að aldri. Hann vakti verðskuldaða athygli með ÍR liðinu þar sem var einn af burðarásunum í sterkum varnarleik liðsins en hann missti vart úr leik með ÍR árin sem hann hélt til í Breiðholtinu.
Ingvar sem er hörku íþróttamaður tók sér svo pásu frá handboltanum og gerði það meðal annars gott í crossfit heiminum en hann var einnig öflugur í frjálsum íþróttum á sínum yngri árum, segir ennfremur í tilkynningu frá KA.
Karlar – helstu félagaskipti 2025
Konur – helstu félagaskipti 2025
Þjálfarar – helstu breytingar 2025
