Hornamaðurinn Guðmundur Árni Ólafsson er á leið í aðgerð á öxl í byrjun september og leikur ekki með Aftureldingu um ótiltekinn tíma. Ómögulegt er að segja hversu lengi en eftir því sem næst verður komist þá mun framhaldið hjá þessum sterka og þrautreynda hornamanni ekki skýrast fyrr en læknir hefur metið stöðuna eftir aðgerð.
Guðmundur Árni hefur sett sterkan svip á lið Aftureldingar síðan hann gekk til liðs við Mosfellinga sumarið 2019. Hann var að margra mati besti leikmaður liðsins leiktíðina 2019/2020 og var í framhaldinu valinn íþróttakarl Aftureldingar í lok síðasta árs.
Guðmundur er þrautreyndur og hefur m.a. leikið með Selfossi, Haukum og HK auk þess að vera í leikmaður Bjerringbro/Silkeborg og Mors-Thy í dönsku úrvalsdeildinni um árabil.
