Íslenska landsliðið í handknattleik karla, skipað leikmönnum 19 ára og yngri, tapaði með minnsta mun, 31:30, fyrir Spáni í úrslitaleik Opna Evrópumótsins í Scandinavium-íþróttahöllinni í Gautaborg í kvöld.
Íslenska liðið skoraði tvö síðustu mörk leiksins, vantaði herslumun upp á að jafna metin og knýja fram framlengingu.
Piltarnir koma heim með silfurverðlaun og reynslunni ríkari frá mótinu að loknum fimm sigurleikjum og tveimur töpum, bæði fyrir spænska landsliðinu.
Spánverjar voru með yfirhöndina í úrslitaleiknum frá byrjun til enda. Forskot þeirra rokkaði frá tveimur og upp í fjögur mörk í síðari hálfleik. Staðan var 17:13, Spáni í hag að loknum fyrri hálfleik.
Næsta verkefni U19 ára landsliðsins verður þátttaka í heimsmeistaramótinu sem hefst í Kaíró í Egyptalandi eftir réttan mánuð.
Mörk Íslands: Garðar Ingi Sindrason 10, Bessi Teitsson 6, Elís Þór Aðalsteinsson 3, Marel Baldvinsson 3, Ágúst Guðmundsson 2, Dagur Árni Heimisson 2, Jens Bragi Bergþórsson 2, Andri Erlingsson 1, Egill Jónsson 1.
Varin skot: Jens Sigurðarson 9, Sigurjón Bragi Atlason 5.
- Króatía hafnaði í þriðja sæti mótsins með sigri á Svíþjóð í dag, 33:30. Þar á eftir komu Pólland, Egyptaland, Færeyjar, Eistland, Holland, Litáen og Finnland.
