Króatíski markvörðurinn Filip Ivic var í morgun rekinn frá serbneska liðinu RK Vojvodina fyrir að sækja samkomu króatísku hljómsveitarinnar Thompson. Eftir því sem fram kemur í yfirlýsingu félagsins þá munu skoðanir hljómsveitarinnar stríða gegn skoðunum Serba og gildum félagsins. Ekki er langt síðan Króatar og Serbar háðu blóðuga styrjöld árum saman.
Hljómsveitin Thompson hefur verið bannað að halda tónleika víða í Evrópu vegna pólitískra skoðanna sinna. Hún er sögð ala á hatri.
„Hjá handknattleiksfélagi Vojvodina er ekki pláss fyrir mann sem sækir viðburð sem móðgar minningu þúsundir saklausra fórnarlamba,“ segir m.a. í tilkynningu RK Vojvodina í morgun þar sem fram kemur að ekki hafi verið um tónleika að ræða heldur áróðursamkomu.
„Félagið flokkar ekki fólk eftir þjóðerni eða trú, en við gerum greinlega mun á góðu og illu, mannúð og ómannúð. Fyrir félag sem ber skjaldarmerkið serbnesku þjóðarinnar, er þetta ekki og getur ekki verið viðunandi,“ segir ennfremur í tilkynningunni.
Með bækistöðvar í Novi Sad
RK Vojvodina, sem hefur haft á að skipa öflugasta handknattleiksliði Serbíu á síðustu árum, hefur aðsetur í borginni Novi Sad sem kom mikið við sögu í borgarstyröldinni í landinu á tíunda áratugnum og einnig í síðari heimsstyrjöldinni þegar Serbar voru í liði bandamanna en Króatar fylgdu nasistum.
Ivic, sem er 32 ára gamalll og hefur leikið 43 landsleiki fyrir Króata, var á síðustu leiktíð markvörður RK Eurofarm Pelister í Norður Makedóníu. Áður hefur hann m.a. leikið með RK Zagreb, Kielce, Gummersbach, Celje og Chambéry.
