HK og Selfoss fögnuðu sigri í fyrstu umferð Ragnarsmótsins í handknattleik kvenna í Iðu á Selfossi í kvöld. HK vann öruggan sigur á Gróttu, 28:20, eftir að hafa gert út um leikinn í fyrri hálfleik. Þá hafði Kópavogsliðið mikla yfirburði og gekk til búningsherbergis með átta marka forskot, 15:7. Selfoss hafði betur gegn Aftureldingu í hörkuleik, 26:25.
Mörk HK: Aníta Eik Jónsdóttir 5, Jóhanna Margrét Sigurðardóttir 4, Sara Katrín Gunnarsdóttir 4, Berglind Þorsteinsdóttir 3, Tinna Sól Björgvinsdóttir 2, Alda Brá Hagalín 2, Þóra María Sigurjónsdóttir 2, Alexandra Líf Arnarsdóttir 2, Karen Kristinsdóttir 1, Lovísa Líf Helenudóttir 1, Inga Dís Jóhannsdóttir 1, Embla Steindórsdóttir 1, Elna Ólöf Guðjónsdótti 1.
Mörk Gróttu: Rut Bernódusdóttir 4, Katrín Helga Sigurbergsdóttir 3, Hrafnhildur Hekla Grímsdóttir 3, Guðný Hjaltadóttir 3, Helga Guðrún Sigurðardóttir 2, Katrín Anna Ásmundsdóttir 2, Nína Líf Gísladóttir 1, Helga Dögg Þorsteinsdóttir 1. Dagný Lára Ragnarsdóttir 1.
Selfoss náði mest sex marka forystu í síðari hálfleik gegn Aftureldingu, 20:14. Mosfellingar lögðu ekki árar í bát þrátt fyrir mótbyr og tókst að jafna metin, 24:24, þegar fimm mínútur voru til leiksloka. Var það í fyrsta sinn síðan í stöðunni 0:0 að jafnt var á metunum. Afturelding komst yfir, 25:24, í eina skiptið í leiknum þegar þrjár mínútur voru eftir. Selfoss svaraði með tveimur mörkum og tókst að hanga á sigrinum þótt engu hafi mátt muna að Aftureldingarliðinu lánaðist að jafna metin á síðustu sekúndu.
Mörk Selfoss: Elínborg Katla Þorbjörnsdóttir 7, Roberta Ivanauskaitė 7, Tinna Sigurrós Traustadóttir 5, Emilía Ýr Kjartansdóttir 3, Tinna Soffía 2, Hugrún Tinna Róbertsdóttir 1.
Mörk Aftureldingar: Ólöf Marín Hlynsdóttir 6, Drífa Garðarsdóttir 5, Sylvía Blöndal 3, Susan Ines Gamboa 3, Katrín Helga Davíðsdóttir 2, Elín Krista Sigurðardóttir 2, Katrín Hallgrímsdóttir 1, Telma Rut Frímannsdóttir 1.
Því miður vantar mörk inn á leikskýrsluna hjá báðum liðum.
Mótinu verður framhaldið á miðvikudagskvöld. Selfoss tekur þá slaginn við HK auk þess sem Afturelding og Grótta mætast.
