„Byrjunin á leiknum var okkur dýr. Við vorum strax komin í eltingaleik við þær,“ sagði Ágúst Þór Jóhannsson annar þjálfara U19 ára landsliðs kvenna eftir fimm marka tap, 26:21, fyrir Pólverjum í fyrstu umferð milliriðlakeppni Evrópumótsins í Svartfjallalandi í morgun.
„Okkur tókst að leika frábæra 5/1 vörn síðustu 20 mínúturnar en hefðum mátt nýta okkur það betur með hröðum upphlaupum,“ sagði Ágúst ennfremur.
„Varnarleikur og markvarsla var fín lengst af en því miður þá gerðum við okkur sek um of mörg mistök í sóknarleiknum að þessu sinni, eins og hann hafði verið fínn í mótinu fram til þessa,“ sagði Ágúst Þór.
Íslenska liðið hefur sólarhring til þess að jafna sig fyrir átökin við Norður Makedóníu á morgun. Sú viðureign getur haft mikil áhrif á það hvort Íslandi tekst að krækja í sæti á HM á næstu ári. Sextán efstu liðin á EM fá farseðil á HM 20 ára landsliða.
Stöðugleiki og sigur
„Við viljum ná jafnari frammistöðu á morgun gegn Norður Makedóníu. Fram til þessa höfum við náð góðum köflum í leikjum en fallið niður þess á milli. Slöku kaflarnir hafa verið of slakir. Stöðugleiki verður markmiðið á morgun auk þess að vinna leikinn,“ sagði Ágúst Þór Jóhannsson annar þjálfara U19 ára landsliðs kvenna.
Slæmur fyrri hálfleikur kom íslenska liðinu í koll
