Vatnslaust var á hóteli 19 ára landsliðs kvenna í Podgorica í Svartfjallalandi í morgun þegar leikmenn, þjálfarar og starfsfólk fór á fætur og ætlaði að skola af sér í steypibaði. Eftir því sem næst verður komist tókst að koma vatni á hótelið aftur þegar leið á morguninn.
Leikur klukkan 10
Framundan hjá íslenska liðinu er viðureign við norska landsliðið í krossspili um sæti 13 til 16 klukkan 10 að íslenskum tíma. Bæði lið töpuðu viðureignum sínum í gær. Ísland fyrir Serbíu, 29:24 en Noregur, 31:29.
Viðureign Íslands og Noregs hefst klukkan 10 og verður fylgst með henni í textalýsingu á handbolti.is auk þess sem vonandi verður útsending á ehftv.com. Útsendingin frá viðureigninni við Serba í gær var með höppum og glöppum.
Afmæli yfirfararstjórans
Yfirfararstjóri íslenska keppnishópsins í Podgorica og formaður landsliðsnefndar kvenna, Guðríður Guðjónsdóttir, á afmæli. Væntir íslenski hópurinn þess að sú staðreynd verði íslenska liðinu til lukku í viðureigninni við Noreg.
Leikjadagskrá: EM19-’25: Úrslit í leikjum í krossspili og um sæti
