Guðmunudur Hólmar Helgason, fyrrverandi landsliðsmaður í handknattleik, hefur ákveðið að setja punkt aftan við handknattleiksferilinn. Hann staðfestir ákvörðun sína við Handkastið.
Guðmundur Hólmar fylgir þar með í kjölfar frænda síns, Geirs Guðmundssonar, sem sagði frá því á dögunum að líklega hafi hann bundið enda á handknattleiksferilinn.
Guðmundur Hólmar sem er 33 ára gamall hefur síðustu tvö ár leikið með Haukum en var þar áður með Selfoss um tveggja ára skeið eftir að hafa flutt heim frá Vínarborg. Í Vínarborg lék Guðmundur Hólmar hjá West Wien. Einnig var Guðmundur Hólmar í nokkur ár með Cesson Rennes í Frakklandi.
Einnig lék Guðmundur Hólmar með Akureyri handboltafélagi og Val.
Guðmundur Hólmar lék á þriðja tug landsleikja á þeim tíma sem Geir Sveinsson var landsliðsþjálfari frá 2016 til 2018 og var m.a. í leikmannahópnum á HM 2017, í Frakklandi, fyrst og fremst í hlutverki varnarmanns.
