Franska handknattleiksliðið Nancy, sem Elvar Ásgeirsson lék með í hálft annað ár, frá því snemma árs 2021 og fram til sumars 2022, stendur höllum fjárhagslegum fótum um þessar mundir. Félagið hefur ekki fengið endurnýjað keppnisleyfi fyrir næstu leiktíð frá franska handknattleikssambandinu. Fyrir vikið er nafn félagsins ekki að finna á lista yfir þátttökulið næst efstu deildar á næstu leiktíð. Leikjadagskrá næsta tímabils hefur verið birt. Aðeins fimmtán lið eru skráð til leiks. Óvíst er hvert verður sextánda liðið. Keppni í 2. deild hefst 5. september.
Forráðamenn Nancy hafa kært ákvörðun franska handknattleikssambandsins um að synja félaginu um keppnisleyfi. Skilja þeir ekki neitt í neinu. Sambandið situr fast við sinn keip en afar strangt eftirlit er með fjárhag félaga í Frakklandi eftir mörg gjaldþrot meðal félaga á síðasta áratug síðustu aldar. Félögin verða að senda inn fjárhagsáætlun fyrir komandi leiktíð ásamt endurskoðaðri fjárhagsstöðu fyrir hvert ár. Ekki má eyða evru umfram áætlanir nema að fengnu leyfi eftirlitsnefndar handknattleikssambandsins, t.d. komi eitthvað óvænt upp meðan leiktíð stendur yfir.
Elvar Ásgeirsson, nú leikmaður Ribe-Esbjerg, var í liði Nancy sem lék í efstu deild 2021/202 eftir sigur í umspili vorið 2021. Nancy féll úr efstu deild vorið 2022 og hefur síðan verið í toppbaráttu 2. deildar. Komst liðið m.a. í umspil í vor en náði ekki að fara alla leið upp í efstu deild aftur.
