- Auglýsing -
- Kórdrengir leita logandi ljósi að þjálfara fyrir lið sitt áður en átökin hefjast í Grill 66-deildinni eftir hálfa fjórðu viku. Handbolti.is hefur heimildir fyrir því að Kórdrengir hafi m.a. rætt við Bjarka Sigurðsson þjálfara og fyrrverandi landsliðsmann í handknattleik en ekki haft erindi sem erfiði. Æfingar eru komnar á skrið hjá liði Kórdrengja þótt þjálfara vanti og mun engan bilbug vera að finna á forsvarsmönnum liðsins sem gera sér vonir um að ráða þjálfara á allra næstu dögum.
- Steinunn Hansdóttir skoraði eitt mark fyrir sitt nýja lið, Skanderborg Håndbold, þegar liðið tapaði fyrir København Håndbold, 23:19, í 16-liða úrslitum dönsku bikarkeppninnar í handknattleik.
- Bergischer HC, sem landsliðsmaðurinn Arnór Þór Gunnarsson leikur með í þýsku 1. deildinni í handknattleik hefur samið við danska línumannninn Frederik Ladefoged. Hann kemur til félagsins frá SönderjyskE á næsta sumri og á að leysa Max Darj sem flytur sig um set og gengur til liðs við Füchse Berlin.
- Jorge Duenas, sem þjálfað hefur kvennalandslið Brasilíu síðustu fimm ár, er hættur störfum. Óánægja var með árangur landsliðsins á Ólympíuleikunum í Tókýó. Af þeim sökum hefur Spánverjinn tekið hatt sinn og staf og róið á ný mið. Cristiano Rocha sér um undirbúning og stýrir landsliðinu í undankeppni Suður- og Mið-Ameríku sem fram fer í október. Rocha var aðstoðarþjálfari Duenas en mun ekki vera hugsaður sem landsliðsþjálfari til lengri tíma.
- Norðmaðurinn Joakim Hykkerud sem um árabil lék með norska landsliðinu hefur gengið til liðs við Lemvig í dönsku úrvalsdeildinni. Hykkerud lék með Drammen fram yfir sl. áramót og tók síðan endasprettinn með AEK í Aþenu í vor eftir að keppni í norsku úrvalsdeildinni lagðist af vegna kórónuveirunnar.
- Auglýsing -
