Sautján ára landslið kvenna í handknattleik steinlá fyrir landsliði Sviss, 35:22, í þriðju og síðustu umferð riðlakeppni Evrópumótsins í handknattleik í Podgorica í Svartfjallalandi í dag. Ísland hafnaði þar með í þriðja sæti C-riðils og tekur þátt í keppni liða um sæti 12 til 24 á mótinu. Næstu tveir leikir verða á mánudag og þriðjudag. Síðar í dag skýrist hverjir andstæðingarnir verða þegar keppni verður lokið í D-riðli.
Sviss og Holland höfnuðu í tveimur efstu sætum C-riðils. Holland vann Færeyar í morgun, 30:15.
Skemmst er frá því að segja að landslið Sviss var mikið öflugra í leiknum í dag ef undan eru skildar 10 til 15 fyrstu mínúturnar. Sóknarleikur íslenska liðsins gekk illa og m.a. skoraði liðið ekki marki í 14 mínútur í fyrri hálfleik. Er þetta annar markaþurrðakafli liðsins á mótinu.
Sviss var með 10 marka forskot í hálfleik, 18:8, og nánast formsatriði að ljúka leik í síðari hálfleik, því miður.
Mörk Íslands: Agnes Lilja Styrmisdóttir 5, Laufey Helga Óskarsdóttir 5, Tinna Ósk Gunnarsdóttir 4, Roksana Jaros 3, Eva Lind Tyrfingsdóttir 2, Vigdís Arna Hjartardóttir 1, Hekla Sóley Halldórsdóttir 1, Alba Mist Gunnarsdóttir 1.
Varin skot: Danijela Sara Björnsdóttir 9/2 – Erla Rut Viktorsdóttir 0.
Mörk Sviss: Emma Heer 6, Noëlle Osterwalder 5, Jessica Acklin 5, Lauryn Mierzwa 4, Cristina Hofstetter 3, Nora Emmenegger 3, Amy Koch 3, Sophia Rhyner 2, Aita Wegmann 1, Lisa Herger 1, Haylie Wildhaber 1, Lena Stoll 1.
Varin skot: Jael Billeter 13, 48,1% – Leandra Setz 4, 33,3%.
EM17-’25: Leikjadagskrá, riðlakeppni, úrslit, staðan
Handbolti.is fylgdist með leiknum í textalýsingu hér fyrir neðan.
