Ágúst Elí Björgvinsson markvörður hefur verið lánaður frá Ribe-Esbjerg til dönsku meistaranna Alaborg Håndbold. Hann hleypur í skarðið fyrir Niklas Landin, fyrrverandi landsliðsmarkvarðar Dana, sem er meiddur á hné og verður frá keppni a.m.k. í sex til átta vikur, eftir því sem fram kemur í tilkynningu Aalborg Håndbold í hádeginu.
Landin er á leið í speglun á hné vegna eymsla í liðþófa.
Ágúst Elí myndar markvarðapar með Fabian Norsten, hinum markverði Aalborg. Ljóst að Ágúst Elí mun þreyta frumraun sína í Meistaradeild Evrópu þegar Alaborg Håndbold hefur keppni í deildinni eftir mánuð.
Ágúst Elí sem leikið hefur um 50 landsleiki hefur leikið með Ribe-Esbjerg í þrjú ár og var þar áður hjá KIF Kolding í tvö ár að lokinni tveggja ára vist hjá IK Sävehof í Svíþjóð hvaðan hann kom frá uppheldisfélagi sínu FH.
Ágúst Elí er á leiðinni til Þýskalands með nýjum samherjum þar sem Álaborgarliðið tekur þátt í æfingamóti, Heide Cup, um helgina ásamt Kolstad frá Noregi, Kadetten Schaffhausen frá Sviss og þýsku liðunum Gummersbach, HSV Hamburg og Hannover-Burgdorf.
