- Auglýsing -
- Gísli Þorgeir Kristjánsson, landsliðsmaður, lék sinn fyrsta handboltaleik í gærkvöld síðan hann fór úr axlarlið síðla í mars á þessu ári. Gísli Þorgeir var í liði SC Magdeburg er það mætti HC Erlangen og vann, 34:22, í síðasta æfingaleik liðsins áður en átökin byrja í þýsku 1. deildinni í handknattleik á miðvikudaginn. Gísli Þorgeir hefur gengið í gegnum erfiða endurhæfingu og virðist vera að komast á gott skrið. Hann skoraði eitt mark í leiknum og átti þátt í sirkusmarki þar að auki.
- Gísli Þorgeir fékk afar hlýjar viðtökum frá stuðningsmönnum SC Magdeburg þegar hann steig inn á leikvöllinn í fyrsta sinn á 18. mínútu leiksins og var sérstaklega boðinn velkominn til leiks. Fjölmenni áhorfenda var á leiknum enda eru stuðningsmenn SC Magdeburg orðnir afar áhugasamir eftir að hafa orðið af nær öllum leikjum síðasta keppnistímabils.
- Ómar Ingi Magnússon, markakóngur þýsku 1. deildarinnar á síðustu leiktíð, skoraði fimm af mörkum Magdeburg í þessum örugga sigri liðsins á HC Erlangen sem einnig leikur í efstu deild þýska handboltans.
- Ýmir Örn Gíslason lék að vanda með Rhein-Neckar Löwen í gær þegar liðið vann Wetzlar, 31:30, í æfingaleik á heimavelli Löwen.
- Elvar Örn Jónsson skoraði þrjú mörk og Arnar Freyr Arnarsson tvö þegar MT Melsungen tapaði fyrir Leipzig, 34:27, í æfingaleik í gær. Alexander Petersson skoraði ekki mark í leiknum fyrir Melsungen en Guðmundur Þórður Guðmundsson þjálfar liðið.
- Auglýsing -
