Bjarki Már Elísson og samherjar í bikarmeistaraliði Lemgo töpuðu naumlega fyrir Þýskalandsmeisturum THW Kiel, 30:29, í meistarakeppninni í handknattleik í kvöld. Kiel var þremur mörkum yfir, 17:14, að loknum fyrri hálfleik og hélt yfirhöndinni lengst af í leiknum.
Leikmenn Lemgo gáfu lítt eftir. Þeir reyndu hvað þeir gátu og náðu svo að velgja meisturunum undir uggum þótt það nægði ekki þegar upp var staðið.
Gedeon Guardiola Villaplana var markahæstur hjá Lemgo með átta mörk, Bjarki Már og Marcel Timm voru næstir með sex mörk hvor. Bjarki Már skoraði eitt marka sinna úr vítakasti en honum brást bogalistin í tvígang. Niclas Ekberg var markahæstur hjá Kiel með fimm mörk. Patrick Wiencek, Sander Sagosen og Henrik Pekeler skoruðu fjögur mörk hver.
Keppni í þýsku 1. deildinni hefst á miðvikudaginn. Lemgo mætir MT Melsungen á heimavelli í upphafsumferðinni.
