Ekkert verður úr því að Kári Kristján Kristjánsson leiki með ÍBV á næsta keppnistímabili. Að hans sögn ákvað félagið að bjóða honum ekki nýjan samning í sumar. Frá því segir Kári Kristján í samtali við Handkastið en miðilinn hefur talsvert fjallað um Kára síðustu vikur og daga.
Vegna veikinda gat Kári Kristján aðeins leikið einn leik með ÍBV eftir áramótin og fram á vor. Hann hafði í hyggju að halda áfram á komandi leiktíð enda orðinn góður til heilsunnar á ný.
„Eins og þetta lítur út núna þá virðist ferillinn vera búinn,“ segir Kári Kristján við Handkastið.
Kári Kristján hefur leikið með ÍBV síðustu 10 ár eftir að hann sneri heim til Eyja eftir fimm ára veru hjá ZMC Amicitia Zürich, HSG Wetzlar og Berringbro/Silkeborg auk eins árs með Val, 2014/2015. Til viðbótar var Kári Kristján leikmaður Hauka frá 2005 til 2009 en til Hafnarfjarðarfélagsins kom hann frá ÍBV 2005, 21 árs að aldri.
Um 15 ára skeið, 2005 til 2020 lék Kári Kristján 145 landsleiki. Þeir síðustu voru á EM 2020 í Svíþjóð.
