Leikmenn 19 ára landsliðsins í handknattleik, þjálfarar og starfsmenn, fóru í morgun í skoðunarferð að píramídunum og Sfinxinum í Giza-sléttunni rétt utan við Kaíró, eitt af sjö undrum veraldar. Um klukkustundarferð er frá hóteli landsliðshópsins og á Giza-sléttuna.
Brjóta upp dagskrána
„Við ákváðum að brjóta aðeins upp dagskrána úr því að við eigum frídag frá leikjum. Það hefur verið mikil keyrsla á strákunum,“ sagði Heimir Ríkarðsson annar þjálfari 19 ára landsiðsins við handbolta.is.
Ferskir fætur á morgun
Þegar komið verður til baka eftir hádegið eiga menn að slaka á fyrir átökin á morgun. „Við stefnum á að mæta með ferska fætur í leikinn við Egypta á morgun,“ sagði Heimir þjálfari sem einu sinni áður hefur komið að píramídunum á Giza-sléttunni.
Síðasti leikurinn
Viðureign Íslands og Egyptalands um 5. sæti HM hefst klukkan 11.45 á morgun. Handbolti.is ætlar ekki að bregða út vananum og tengist áfram streymi frá leiknum auk þess að vera með textalýsingu.
Leikurinn verður sá áttundi hjá íslenska landsliðinu frá 6. ágúst.
HM19-’25: Leikjadagskrá – leikir um sæti
