Skara HF og IK Sävehof, sem hafa á að skipa íslenskum handknattleikskonum unnu leiki sína í annarri umferð riðlakeppni sænsku bikarkeppninnar í kvöld og standa afar vel að vígi þegar tvær umferðir af fjórum eru að baki.
Aldís Ásta og Lena Margrét
Aldís Ásta Heimisdóttir skoraði fjögur mörk og Lena Margrét Valdimarsdóttir eitt í 19 marka sigri meistaraliðsins Skara HF, 39:20, á Tyresö á heimavelli. Skara hefur fjögur stig í efsta sæti 1. riðils.
AIK og Tyresö hafa tvö stig hvort en Eskilstuna Guif rekur lestina án stiga. AIK vann Guif í Eskilstuna í kvöld, 26:21. Vilborg Pétursdóttir, sem leikið hefur með AIK undanfarin ár, er barnshafandi og þar af leiðandi komin í frí frá handknattleik.
Elín Klara næst markahæst
Elín Klara Þorkelsdóttir skoraði sex mörk og var næst markahæst í öruggum sigri IK Sävehof á Kärra HF, 31:24, á heimavelli Kärra í riðli tvö. IK Sävehof er með fjögur stig að loknum tveimur fyrstu leikjunum.
Kristianstad er efst
Kristianstad lagði Eslöv, 35:24, á heimavelli og er efst í riðli sjö með fjögur stig. Berta Rut Harðardóttir var ekki í leikmannahópi Kristianstad í kvöld, ekkert frekar en þegar liðið vann Hallby á sunnudaginn.
Leikið er í átta riðlum og komast tvö áfram úr hverjum eftir að leikin hefur verið einföld umferð í hverjum riðli.
Aldís Ásta og Lena Margrét fögnuðu sigri
Léttur fyrsti leikur hjá Elínu Klöru í Svíþjóð
