Ole Bitsch sagði í morgun óvænt upp störfum sem þjálfari danska úrvalsdeildarliðsins Viborg. Talið er uppsögnin tengist þeirri ólgu sem ríkt hefur innan félagsins síðstu vikur. Alltént má lesa það á milli línanna í tilkynningu Bitsch. Aðeins er vika þangað til keppni hefst í úrvalsdeild kvenna í Danmörku.
Eins og handbolti.is hefur ítrekað sagt frá þá neita leikmenn Viborg að æfa og leika með Christina Pedersen markahæsta leikmanni liðsins á síðustu leiktið. Pedersen hefur verið í æfingabanni í rúmar fjórar vikur.
„Ég hef kosið að segja upp samningi mínum eftir það sem á undan er gengið hjá okkur síðustu mánuði. Ég er viss um að það er liðinu, og ekki síður mér, fyrir bestu,“ sagði Bitsch í tilkynningu sem Viborg sendi frá sér í morgun.
Viborg er eitt af rótgrónari úrvalsdeildarliðum í dönskum handknattleik þótt liðið hafi ekki verið í hópi þeirra alla efstu á síðustu árum.
