Uppnám er í rúmenska handknattleiknum eftir að þrír af fjórum stjórnarmönnum dómaranefndarinnar sögðu af sér í vikunni. Stjórnarmenn dómaranefndarinnar öxluðu sín skinn eftir að stjórn rúmenska handknattleikssambandsins virti að vettugi ákvörðun nefndarinnar að senda dómara í ótímabundið bann frá dómgæslu.
Dómaranefndin er óstarfhæf með einum stjórnarmanni sem ofan í kaupið hefur aðeins á sinni könnu málefni yngri dómara.
Brigslyrði síst spöruð
Töluverður hiti hefur verið nokkrum leikjum í rúmenska handboltanum í upphafi deildarkeppninnar, ekki síst í kvennaflokki. Hafa margir dómar þótt svo augljóslega rangir að ekki sé hægt að flokka sem einfalda yfirsjón í hita leiksins. Slegið hefur hressilega í brýnu á milli félaga, ekki síst á samfélagsmiðlum, og brigslyrði síst spöruð.
Fékk ekki sínu framgengt
Dómaranefndin vildi grípa til aðgerða og senda dómara sem virtust ekki starfi sínu vaxnir í leyfi frá störfum. Sem fyrr segir skellti stjórn handknattleikssambandsins skollaeyrum við og því sagði nánast öll nefndin af sér. Óvíst er hver næstu skref verða en ástandið um þessar mundir skaðar verulega orðspor handknattleiks í Rúmeníu.
