Hinn þrautreyndi markvörður Davíð Hlíðdal Svanson hefur fengið félagaskipti til KA frá HK. Samkvæmt heimildum handbolta.is ætlar Davíð að vera KA-mönnum innanhandar meðan færeyski landsliðsmarkvörðurinn Nicholas Satchwell verður frá keppni. Satchwell hefur verið slæmur í baki upp á síðkastið en mun vera á batavegi eftir því sem næst verður komist þótt erfitt sé að slá föstu hvenær hann verður klár í slaginn á ný.
Davíð lék síðast með HK í fyrrahaust en dró síðan saman seglin eftir að hafa tekið við nýju starfi. Hann hefur fengið leikheimild og verður þar af leiðandi gjaldgengur með KA gegn Stjörnunni í átta liða úrslitum Coca Cola-bikarsins í TM-höllinni á mánudaginn.
Bruno Bernat er eini markvörðurinn í herbúðum KA í fjarveru Satchwell eftir að Svavar Ingi Sigmundsson gekk til liðs við FH í sumar. Af þeim sökum leituðu KA-menn logandi ljósi að manni til að standa vaktina með Bruno meðan Satchwell verður fjarri góðu gamni.
Davíð lék lengst af með Aftureldingu en hefur einnig staðið vaktina með Fram og HK auk Nøtterøy í Noregi um árabil við afar góðan orðstír.
