Færeyski handknattleiksmaðurinn Bjarni í Selvindi leikur ekki með Val næstu vikurnar. Hann gekkst undir aðgerð á öxl á síðasta föstudag. Ágúst Þór Jóhannsson þjálfari Vals staðfesti þetta við Handkastið.
Bjarni hefur átt í eymslum í öxl síðan á síðustu leiktíð. Hann fór í sprautumeðferð í sumar sem virðist ekki hafa skilað tilætluðum árangri.
Fleiri leikmenn Vals eru á sjúkralista. Róbert Aron Hostert fór í aðgerð á ökkla í gær og verður í gifsi í þrjár til fjórar vikur samkvæmt því sem Ágúst Þór sagði við handbolti.is í dag. „Það verður svo að koma í ljós hvenær hann getur byrjað aftur með okkur,“ sagði Ágúst við handbolta.is eftir hádegið í dag.
Beinflís við liðband í öðrum ökkla Róberts var fjarlægt í aðgerðinni í gær.
Magnús Óli Magnússon er einnig á sjúkralista en verður væntanlega tilbúinn í slaginn fljótlega, jafnvel gegn Þór í 3. umferð Olísdeildar í Höllinni á Akureyri á föstudag.
