Áfram er á brattann að sækja hjá Guðmundi Þórði Guðmundssyni og lærisveinum hans í danska úrvalsdeildarliðinu Fredericia HK. Í kvöld tapaði liðið þriðja leiknum sínum á leiktíðinni í heimsókn til Nordsjælland, 31:26. Fredericia HK hefur aðeins unnið einn leik af fjórum og víst er að ekki mun ánægja margra stuðningsmanna liðsins aukast eftir tapið fyrir Nordsjælland.
Næsti leikur Fredericia verður gegn GOG á heimavelli á laugardaginn eftir viku.
Ekki gekk heldur vel hjá öðru Íslendingaliði í kvöld, TTH Holstebro. Liðið tapaði í heimsókn til suður Jótlands á heimavöll SønderjyskE, 31:29, og hefur fjögur stig eftir fjóra leiki.
Jóhannes Berg Andrason skoraði þrjú mörk fyrir TTH Holstebro og gaf þrjár stoðsendingar.
Stöðuna í dönsku úrvalsdeildinni og í fleiri deildum evrópsks handknattleiks er að finna hér.
