Óðinn Þór skoraði 15 mörk í Thun

Óðni Þór Ríkharðssyni héldu engin bönd í kvöld þegar hann skoraði 15 mörk í 16 skotum í sjö marka sigri Kadetten Schaffhausen, 37:30, heimavelli Wacker Thun í A-deildinni í Sviss. Þrjú markanna skoraði Óðinn Þór úr vítaköstum og var með fullkomna nýtingu.

Óðinn Þór er næst markahæsti leikmaður A-deildarinnar í Sviss með 48 mörk eftir sex umferðir. Gadza Ante leikmaður Wacker Thun er markahæstur með 53 mörk. Ante skoraði 12 mörk í 18 skotum í leiknum í kvöld.

Kadetten er efst í deildinni með 12 stig eftir sex umferðir. Annars er staðan í deildinni og í fleiri deildum evrópsks handknattleiks að finna hér.