Slóveninn Franjo Bobinac hefur tilkynnt um framboð til embættis forseta Alþjóða handknattleikssambandsins á þingi sambandsins sem fram í fer Kaíró 19. – 21. desember. Hann er þriðji frambjóðandinn sem sækist eftir kjöri. Auk Bobinac hefur Gerd Butzeck tilkynnt um framboð að ógleymdum forseta IHF, síðasta aldarfjórðung, Hassan Moustafa, sem er ekki af baki dottinn.
Bobinac er 66 ára gamall. Undanfarin ár hefur hann verið forseti Ólympíusambands Slóveníu en var áður formaður handknattleikssambands landsins frá 2008 til 2022.
Bobinac er stjórnarformaður heimilistækjaframleiðandans Gorenje. Hann er af mörgum talinn vera maðurinn á bak við uppbyggingu Gorenje sem var nær gjaldþrota á fyrstu árunum eftir að Júgóslavía liðaðist í sundur á árunum í kringum 1990, áður en Bobinac tók við stjórnartaumunum.
