Viktor Lekve þjálfari KÍF fékk rauða spjaldið í dag níu sekúndum fyrir leikslok í hörkuviðureign liðsins við H71 í færeysku úrvalsdeildinni í handknattleik. Leikið var í Hoyvíkshøllinni. Töluverð spenna var í viðureigninni en eitthvað þótti dómurunum athugavert við gjörðir Viktors sem gerði að verkum að þeir sáu sig tilneydda að sýna honum rauða spjaldið.
Um leið og Viktor fékk rauða spjaldið var liðsmanni hans hjá KÍF frá Kollafirði, Fríði Weyhe, vikið af leikvelli í tvær mínútur. Weyhe var markahæstur leikmanna KÍF með 10 mörk.
H71 vann leikinn með minnsta mun, 29:28, eftir að hafa verið undir lengst af, m.a. 18:16, að loknum fyrri hálfleik.
KÍF hefur tvö stig að loknum tveimur umferðum en liðið vann Team Klaksvík fyrir viku.
H71 er efst með fjögur stig.
