Sænska meistaraliðið Skara HF á verk fyrir höndum á heimavelli í síðari viðureigninni við norska liðið Molde eftir þriggja marka tap í fyrri viðureigninni í Noregi í gær, 27:24. Sigurður Hjörtur Þrastarson og Svavar Ólafur Pétursson dæmdu leikinn í Molde.
Aldís Ásta Heimisdóttir skoraði fjögur mörk fyrir Skara HF og var einu sinni vikið af leikvelli í tvær mínútur. Lena Margrét Valdimarsdóttir skoraði ekki fyrir sænsku meistarana sem voru fjórum mörkum undir að loknum fyrri hálfleik, 15:11.
Síðari viðureignin fer fram í Skara á laugardaginn. Samanlagður sigurvegari leikjanna tveggja tekur sæti í annarri umferð forkeppni Evrópudeildar sem fram fer í fyrri hluta nóvember.
Leikurinn í Molde í gær var fyrsti Evrópuleikur Skara HF í sögu félagsins en lið þess vann sænska meistaratitilinn óvænt í vor.
