Frí er í dag frá leikjum á heimsmeistaramóti félagsliða í handknattleik karla í Kaíró í Egyptalandi. Riðlakeppni mótsins lauk í gær. Framundan eru undanúrslit á morgun og þá fer loksins að hitna í kolunum enda töluverð peningaverðlaun í húfi fyrir sigurliðið.
Meistarar síðasta móts sem fram fór fyrir ári, ungverska meistaraliðið One Veszprém mætir Evrópumeisturum SC Magdeburg í fyrri undanúrslitaleiknum á morgun, þriðjudag.
Sigurliðið fær 350.000 dollara í verðlaunafé, ríflega 42 milljónir kr. Silfurliðið hreppir 150.000 dollara, rúmlega 18 milljónir kr. og bronsliðið fær í sinn hlut 50.000 dollara, 6 milljónir kr.
Í hinni viðureign undanúrslita eigast við Barcelona og Afríku- og Egyptalandsmeistarar Al Ahly. Sigurlið undanúrslita leika til úrslita á fimmtudaginn. Sama dag eigast við taplið undanúrslita um þriðja sætið.
Í gær voru síðustu leikir riðlakeppninnar. Nokkrir Íslendingar komu við sögu.
SC Magdeburg – Sharjah SC 35:25 (16:13).
-Ómar Ingi Magnússon 5/2, Elvar Örn Jónsson 4, Gísli Þorgeir Kristjánsson 4.
-Sharjah SC er frá Sameinuðu arabísku furstadæmunum.
Barcelona – Zamalek 47:25 (24:12).
-Viktor Gísli Hallgrímsson sat á bekknum allan leikinn. Hann var í marki liðsins allan fyrri leikinn í riðlakeppninni á laugardaginn gegn Handebol Taubate frá Brasilíu.
-Zamalek er egypskt félagslið.
One Veszprém – Al Ahly SC 31:22 (13:12).
-Bjarki Már Elísson skoraði 1 mark fyrir One Veszprém.
-Al Ahly er egypskur meistari og vann einnig Afríkukeppni meistaraliða á síðasta keppnistímabili.
Leikjum heimsmeistaramóts félagslið er streymt á youtube og hafa m.a. verið aðgengilegir á handbolti.is.
