Bjarki Már Elísson og liðsfélagar í One Veszprém leika annað árið í röð til úrslita á heimsmeistaramóti félagsliða í Kaíró í Egyptalandi. Þeir lögðu Evrópumeistara SC Magdeburg í bragðdaufum undanúrslitaleik í dag, 23:20, eftir að hafa verið tveimur mörkum undir í hálfleik, 11:9.
Bjarki Már skoraði eitt mark fyrir One Veszprém sem mætir annað hvort Barcelona eða Afríkumeisturum Al Ahly í úrslitaleik á fimmtudag. Barcelona og Al Ahly eigast við síðar í dag.
Gísli Þorgeir Kristjánsson skoraði fjögur mörk fyrir Magdeburg en Elvar Örn Jónsson og Ómar Ingi Magnússon skoruðu eitt mark hvor.
Fimm mörk í röð frá One Veszprém um miðjan síðari hálfleik kom liðinu þremur mörkum yfir, 17:14. Eftir það var sigurinn aldrei í verulegri hættu.
One Veszprém vann Magdeburg í úrslitaleik HM félagsliða á síðasta ári.
Sigurliðið fær 350.000 dollara í verðlaunafé, ríflega 42 milljónir kr. Silfurliðið hreppir 150.000 dollara, rúmlega 18 milljónir kr. og bronsliðið fær í sinn hlut 50.000 dollara, 6 milljónir kr.
