Arnar Birkir Hálfdánsson og liðsfélagar í Amo HK risu upp á afturlappirnar í dag eftir þrjá tapleiki í röð í sænsku úrvalsdeildinni í handknattleik og voru fyrstir til að vinna lið Malmö, 29:26. Malmö-liðar höfðu unnið fimm fyrstu viðureignir sína þegar þeir mættu Amo HK.
Arnar Birkir var markahæstur hjá Amo HK með sex mörk í tíu skotum auk tveggja stoðsendinga. Honum var einu sinni vikið af leikvelli.
Amo HK er um miðja deildina eftir sigurinn góða í dag með sex stig að loknum sex leikjum.
Stórsigur í Eskilstuna
Birgir Steinn Jónsson og samherjar í IK Sävehof unnu stórsigur á Guif í Eskilstuna, 37:24. Birgir Steinn skoraði þrjú mörk í sex skotum og gaf fjórar stoðsendingar. IK Sävehof er í 9. sæti af 14 liðum með fimm stig eftir sex leiki.
Áfram gengur flest á afturlöppunum hjá meisturum síðasta árs, Ystads IF HF. Í dag töpuðu meistararnir á heimavelli fyrir Alingsås, 30:27, og sitja í þriðja neðsta sæti með fjögur stig eftir fimm viðureignir.
