Áfram halda meiðsli leikmanna að herja á herbúðir Íslands- og bikarmeistara Fram í handknattleik. Nú stefnir í að færeyski handknattleiksmaðurinn Dánjal Ragnarsson verði frá keppni næstu vikurnar. Dánjal tognaði á nára í viðureign Fram og Víkings í 16-liða úrslitum Poweradebikarsins í gærkvöld. Einar Jónsson þjálfari Fram staðfesti meiðsli Dánjals í svari við skilaboðum til handbolta.is í dag.
Einar sagði að ekki væri hægt að slá föstu hversu lengi Dánjal verði frá keppni en víst væri að náratognun er ævinlega erfið viðureignar og batatíminn getur verið talinn í vikum.
Dánjal kom til Fram í ágúst og hefur svo sannarlega gert það gott og verið einn allra besti leikmaður liðsins.
Fyrir eru á sjúkralista hjá Fram; Marel Baldvinsson með slitið krossband í hné, Magnús Öder Einarsson, einnig meiddur á hné en ekki eins alvarlega og Marel, og stórskyttan Rúnar Kárason. Sá síðarnefndi hefur verið fjarri góðu gamni í tvær vikur vegna meiðsla í kálfa. Rúnar var bjartsýnn á dögunum að verða ekki mjög lengi frá.
Fram fær KA í heimsókn í 6. umferð Olísdeildar á föstudagskvöld og hefur síðan þátttöku í riðlakeppni Evrópudeildarinnar á þriðjudaginn á heimavelli með viðureign við FC Porto.
