Eftir 12 ára veru hjá danska meistaraliðinu, Aalborg Håndbold, hefur danski handknattleiksmaðurinn Buster Juul tilkynnt að hann ætli að róa á ný mið næsta sumar. Juul, sem er 32 ára gamall er markahæsti leikmaður í sögu Aalborg Håndbold. Hann hefur skorað 1.570 mörk og vafalaust eiga fleiri eftir að bætast við áður en leiktímabilið verður á enda.
Ekki liggur opinberlega fyrir hvert Juul fer en talið er sennilegt að þýska deildin heilli kappann en eins gæti Ungverjaland orðið ofan á.
Danskir fjölmiðar segja að Aalborg hafi þegar tryggt sér krafta Magnus Norlyk, ungs en efnilegs hornamanns sem nú leikur með Mors-Thy.
