Í dag hefst keppni í Olísdeild kvenna í handknattleik. Er það vel við hæfi að Íslands- og deildarmeistarar síðasta árs, KA/Þór, taki þátt í fyrsta leiknum og það á heimavelli. Leikmenn KA/Þórs fá vængbrotið lið ÍBV í heimsókn í KA-heimilið klukkan 14. Eins og kom fram í fréttum í vikunni þá sleit Birna Haraldsdóttir, stórskytta ÍBV, krossband í hné fyrir rúmri viku og samherji hennar, Hrafnhildur Hanna Þrastardóttir, bíður eftir að komast í aðgerð á úlnlið og leikur ekki með Eyjaliðinu á næstunni.
Auk leiksins á Akureyri taka nýliðar Aftureldingar á móti Stjörnunni á Varmá og Haukar og HK eigast við í Schenkerhöllinni á Ásvöllum. Báðar viðureignir eru hluti af fyrstu umferð Olísdeilar kvenna. Í framhaldi af síðarnefnda leiknum í Schenkherhöllinni mætast karlalið Hauka og Fram i Olísdeild karla. Það verður semsagt svokallaður tvíhöfði á Ásvöllum.
Síðast en ekki síst þá stíga leikmenn Selfoss fram á sviðið í Evrópukeppni bikarhafa í karlaflokki í dag. Þeir mæta tékkneska liðinu KH ISMM Koprivnice ytra klukkan 13 í dag í fyrstu umferð keppninnar. Síðari leikurinn hefst klukkan 16 á morgun í Sportovni hala Emila Zatopka-íþróttahöllinni. Keppnishöllin er nefnd eftir þekktasta í íþróttamanni Koprivnice og Tékklands, Emil Zátopek. Hann vann það einstæða afrek á Ólympíuleikunum 1952 að vinna gullverðlaun í 5.000, 10.000 og maraþonhlaupi. Nokkuð sem enginn hefur leikið eftir, hvorki fyrr né síðar.
Dagskrá dagsins
Olísdeild kvenna:
KA-heimilið: KA/Þór – ÍBV, kl. 14.
Varmá: Afturelding – Stjarnan, kl. 16.
Schenkerhöllin: Haukar – HK, kl. 16.
Olísdeild karla:
Schenkerhöllin: Haukar – Fram, kl. 18.
Ábendingar um beinar útsendingar frá leikjum dagsins eru vel þegnar á netfangið handbolti@handbolti.is.
