Birgir Steinn Jónsson og liðsfélagar í IK Sävehof lyftust upp í fjórða sæti sænsku úrvalsdeildarinnar í gær með þriggja marka sigri á Helsingborg, 34:31, á heimavelli. Birgir Steinn var atkvæðamestur leikmanna IK Sävehof, skoraði sex mörk úr sjö skotum.
Svo virðist sem leikmenn IK Sävehof séu að sækja í sig veðrið eftir að hafa átt erfitt uppdráttar framan af. Framundan er leikur við Fredericia HK á heimavelli í annarri umferð Evrópudeildarinnar á þriðjudag. Sävehof gerði jafntefli við Tatran Presov, 30:30, í Slóvakíu í fyrstu umferð.
Hvorki gengur né rekur hjá Vinslövs HK
Áfram gengur ekki sem skildi hjá Degi Sverri Kristjánssyni og samherjum í Vinslövs HK í Allsvenskan, næst efstu deild sænska handknattleiksins. Í gær tapaði liðið fimmta leiknum í röð, að þessu sinni fyrir HK Torslanda, 36:35. Dagur Sverrir skoraði eitt mark í leiknum.
Vinslövs HK og Enköping reka lestina í Allsvenskan án stiga að loknum fimm umferðum.
