HK vann í kvöld sjötta leik sinn í Grill 66-deild kvenna í handknattleik og trónir þar af leiðandi áfram á toppnum, fjórum stigum fyrir ofan Gróttu og Víking sem koma næst á eftir. HK lagði FH með sjö marka mun, 23:16, í Kaplakrika eftir að hafa verið marki yfir í hálfleik, 10:9.
Danijela Sara B. Björnsdóttir unglingalandsliðsmarkvörður átti stórleik í marki HK. Hún varði 22 skot og var að öðrum ólöstuðum besti leikmaður vallarins með yfir 50% markvörslu.
FH-ingum tókst að halda aðeins í við HK í fyrri hálfleik. Þegar kom fram í síðari hálfleik munaði gríðarlega um stórleik Danijelu Söru sem ekki aðeins skilaði sér í mörgum vörðum skotum heldur einnig í hröðum upphlaupum í kjölfarið.
Staðan og næstu leikir í Grill 66-deildum.
Mörk FH: Thelma Dögg Einarsdóttir 7, Gyða Kristín Ásgeirsdóttir 4, Eva Guðrúnardóttir Long 2, Ragnhildur Edda Þórðardóttir 2, Elísa Björt Ágústsdóttir 1.
Varin skot: Szonja Szöke 11, Sigrún Ásta Möller 1.
Mörk HK: Tinna Ósk Gunnarsdóttir 5, Jóhanna Lind Jónasdóttir 4, Þórhildur Braga Þórðardóttir 4, Valgerður Ýr Þorsteinsdóttir 3, Hekla Fönn Vilhelmsdóttir 2, Inga Fanney Hauksdóttir 2, Amelía Laufey G. Miljevic 1, Auður Katrín Jónasdóttir 1, Hekla Sóley Halldórsdóttir 1.
Varin skot: Danijela Sara B. Björnsdóttir 22, Tanja Glóey Þrastardóttir 1.
Tölfræði leiksins.
