Handknattleiksdeild HK hefur krækt í reyndan mann til þess að koma inn í þjálfarateymi meistaraflokks karla og leysa þar af hólmi Vilhelm Gauta Bergsveinsson sem hefur orðið að draga saman seglin vegna anna.
Hinn þrautreyndi handknattleiksþjálfari Árni Stefánsson bætist í hópinn. Hann verður aðstoðarþjálfari meistaraflokks karla og mun starfa með Elíasi Má Halldórssyni við þjálfun og stjórn HK-liðsins í Grill 66-deild karla á keppnistímabilinu.
Einnig verður Árni þjálfari 3. flokks karla.
Árna þarf vart að kynna fyrir handknattleiksáhugafólki. Hann er þrautreyndur þjálfari sem víða hefur komið við sem þjálfari og aðstoðarþjálfari á undanförnum áratugum auk þess að hafa sjálfur leikið handknattleik og knattspyrnu á sínum yngri árum.
Árni þekkir vel til í herbúðum HK og hefur áður komið að þjálfun hjá félaginu. M.a. var hann þjálfari karlaliðs HK þegar það vann sinn stóra bikar í meistaraflokki karla árið 2003 þegar HK varð bikarmeistari.
