Viktor Gísli Hallgrímsson varði eitt af 11 skotum sem hann fékk á sig í sigurleik Barcelona á BM Caserío Ciudad Real, 37:27, á heimavelli síðarnefnda liðsins í dag. Mikil stemning var í Quijote Arena, heimavelli Ciudad Real og seldust um 5.000 aðgöngumiðar enda um tímamótaleik að ræða fyrir heimamenn.
Þetta var fyrsta viðureign Barcelona og Ciudad Real í 14 ár en á upphafsárum aldarinnar voru liðin keppninautar um spænska meistaratitilinn. Ciudad Real skartaði á þeim árum mörgum fremstu handknattleiksmönnum heims, þar á meðal Ólafi Stefánssyni. Vann Ciudad Real m.a. Meistaradeild Evrópu oftar en einu sinni. Upp úr 2010 hallaði á ógæfuhliðina hjá Ciudad Real sem lauk með gjaldþroti og samruna við Atlético Madrid. Samruninn reyndist skammgóður vermir fyrir bæði félög.
Ciudad Real er um þessar mundir í 11. sæti af 16 liðum spænsku úrvalsdeildarinnar með 5 stig eftir sjö leiki. Barcelona er efst og hefur ekki tapað stigi í sex fyrstu viðureignum sínum.
Í vor komst Ciudad Real á ný í efstu deild eftir mikið uppbyggingarstarf eins og handbolti.is sagði m.a. frá.
