Íslenska landsliðið í handknattleik karla kemur saman í München í Þýskalandi síðdegis í dag. Framundan eru fyrstu æfingar landsliðsins síðan í maí áður en leikið var við Georgíu í undankeppni Evrópumótsins. Auk æfinga verður leikið tvisvar við þýska landsliðið, annarsvegar á fimmtudaginn klukkan 18.30 í Nürnberg og hinsvegar í Ólympíuhöllinni í München á sunnudaginn kl. 16.15. Báðar viðureignir verða sendar út á RÚV2.
Snorri Steinn Guðjónsson landsliðsþjálfari valdi á dögunum 17 leikmenn til þátttöku í æfingunum og leikjunum tveimur við Þjóðverja.
Snorri Steinn hefur valið Þýskalandsfarana
„Nú hefst undirbúningur fyrir stórmót,“ segir Snorri Steinn í viðtali við handbolta.is áður en hann fór til Þýskalands. Landsliðið tekur þátt í Evrópumótinu í janúar. Æfingarnar í komandi viku er eini tíminn sem landsliðið fær til æfinga áður en komið verður saman aftur um áramótin.
„Það fer margt um höfuðið á mér áður en við komum saman.
Um leið verð ég líka að gæta þess að ætla ekki að gera of mikið. Við verðum að prófa eitt og annað. Haukur [Þrastarson] verður að leika á miðjunni og eins verður við að láta Elvar Örn [Jónsson] leika í sókninni. Hann fær fá tækifæri til þess með Magdeburg. Hans hlutverk er á báðum vallarhelmingum hjá mér,“ segir Snorri Steinn sem væntir einnig þess að stórskyttan Þorsteinn Leó Gunnarsson nýti tækifærið í Þýskalandi.
„Eins vil ég sjá Þorstein Leó [Gunnarsson] á stóra sviðinu. Hann er í fínum stað og hjá góðu liði. Það er hinsvegar ljóst að stóra sviðið er Meistaradeildin og stórmótin. Hann á eftir að stimpla sig inn á því sviði. Mig langar gjarnan að sjá góða frammistöðu hjá honum og það sem hann hefur,“ sagði Snorri Steinn.
Fleiri banka á dyrnar
Snorri Steinn segir að af þeim leikmönnum sem hann hefur í huga fyrir verkefnið í Þýskalandi sé Janus Daði Smárason sá eini sem er fjarverandi vegna meiðsla. Janus Daði eigi að verða tilbúinn í byrjun janúar.
Spurður hvort margir banki á dyr landsliðiðsins umfram þá sem valdir voru segir Snorri Steinn svo vera enda sé hópurinn sem valinn var nú ekki endanlegur keppnishópur vegna EM sem fram fer í janúar.
Lengra viðtal við Snorra Stein er í myndskeiði ofar í þessari grein.
A-landslið karla – fréttasíða.
