Sala aðgöngumiða á vináttulandsleik Færeyinga og Íslendinga í handknattleik kvenna sem fram fer í Þórshöfn laugardaginn 22. nóvember hefst á föstudaginn, 31. október kl. 10. Um verður að ræða síðasta leik beggja þjóða áður en farið verður til Þýskalands þar sem bæði lið hefja keppni á heimsmeistaramótinu 26. nóvember.
Færeyska handknattleikssambandið vekur athygli á miðasölunni og segir að hlekkur á miðasöluna verði tiltækur fljótlega.
Rétt er að minna Íslendinga sem vilja styðja landsliðið í síðasta leiknum fyrir HM að tryggja sér miða sem fyrst eftir að miðasalan hefst.
Gríðarlegur áhugi í Færeyjum
Gríðarlegur áhugi er fyrir handboltalandsliðunum í Færeyjum og uppselt hefur verið á síðustu leiki þess, jafnt kvenna sem karla.
Leikur Færeyja og Íslands fer fram í nýrri og glæsilegri þjóðarhöll Færeyinga, Við Tjarnir, og hefst klukkan 19 laugardaginn 22. nóvember.
Fjöldi Færeyinga stefna til Trier í Þýskalandi á HM í lok nóvember til þess að styðja landsliðið en Færeyingar höfðu varan á sér þegar miðasala hófst í sumar.
Facebook-síða Handknattleikssambands Færeyja.
