„Þetta var alvöru skellur. Við töpuðum fyrir miklu betra liði,“ sagði Stefán Arnarson annar þjálfara Hauka við handbolta.is í kvöld eftir 18 marka tap Hauka fyrir spænska liðinu Costa del Sol Málaga í fyrri viðureign liðanna í 3. umferð, 32-liða úrslitum, Evrópubikarkeppninnar í handknattleik kvenna á Ásvöllum.
„Við byrjuðum hræðilega og voru átta mörkum undir eftir 10 mínútur. Gegn jafn sterku liði og þetta spænska þá er erfitt að koma til baka. Við reyndum en það gekk ekki,“ sagði Stefán ennfremur.
„Leikmenn voru hræddir og litlar í sér í byrjun leiksins. Ástæða þess má skrifa á mig. Þar á ofan þá erum við í brekku um þessar mundir. Spurningin er sú hvort við komumst upp brekkuna.“
Stefán sagði að þegar kom inn í síðari hálfleikinn þá hafi Haukaliðið fengið færi en ekki tekist að færa sér þau í nyt. „Nú verðum við bara að fara til Málaga og skemmta okkur. Annars er aðalmálið hjá okkur að vinna stig í deildinni,“ segir Stefán Arnarson annar þjálfari Hauka.
Lengra viðtal við Stefán er í myndskeiði hér fyrir ofan.
