Fram hafði betur í viðureign við Hauka í Olísdeild kvenna í handknattleik í kvöld, 31:29, er liðin mættust í upphafsleik 9. umferðar í Lambhagahöllinni í Úlfarsárdal. Haukar voru sterkari framan af fyrri hálfleik en Fram-liðinu tókst að komast yfir er á leið og hafa tveggja marka forystu eftir 30 mínútur, 18:16.
Þar með er Fram-liðið komið í frí frá kappleikjum fram til 13. desember vegna þátttöku landsliðsins á heimsmeistaramótinu sem hefst síðar í mánuðinum.
Fram er áfram í 5. sæti deildarinnar eftir sigurinn en hefur færst upp að hlið KA/Þórs með 9 stig. KA/Þór á leik til góða. Haukar eru tveimur stigum á eftir. Hafnarfjarðarliðið fer nær helginni til Spánar til viðureignar við Costa del Sol Málaga.
Framarar voru með yfirhöndina allan síðari hálfleikinn. Haukar sóttu hinsvegar hart að undir lokin og tókst að minnka muninn í eitt mark, síðast 29:28. Ásdís Guðmundsdóttir átti afar góðan leik og skoraði 9 mörk fyrir Fram, þar á meðal 30. og síðasta markið úr vítakasti.
Mörk Fram: Ásdís Guðmundsdóttir 9/1, Alfa Brá Oddsdóttir Hagalín 6, Hulda Dagsdóttir 5, Katrín Anna Ásmundsdóttir 4/2, Harpa María Friðgeirsdóttir 2, Valgerður Arnalds 2, Dagmar Guðrún Pálsdóttir 2, Sara Rún Gísladóttir 1/1.
Varin skot: Ethel Gyða Bjarnasen 10/3, 25,6%.
Mörk Hauka: Embla Steindórsdóttir 8/1, Alexandra Líf Arnarsdóttir 8, Inga Dís Jóhannsdóttir 6/2, Ragnheiður Ragnarsdóttir 2, Jóhanna Margrét Sigurðardóttir 2, Rakel Oddný Guðmundsdóttir 2, Sonja Lind Sigsteinsdóttir 1.
Varin skot: Sara Sif Helgadóttir 12, 30,8% – Erla Rut Viktorsdóttir 4/2, 50%.
Tölfræði leiksins hjá HBStatz.
Staðan og næstu leikir í Olísdeildum.
