Gríðarleg eftirvænting er meðal Akureyringa fyrir bæjarslagnum á milli KA og Þórs í Olísdeild karla en viðureignin fer fram í KA-heimilinu eftir viku, fimmtudaginn 20. nóvember. Viðbúið er að uppselt verði á leikinn á allra næstu dögum.
KA seldi ríflega helming sinna miða í gær og verða aftur með miðasölu á morgun á milli 15 og 17.
Þórsarar tilkynntu á samfélagsmiðlum í dag að sala miða til stuðningsmanna hefjist á morgun, föstudag, meðan leikur Þórs og Aftureldingar fer fram í Íþróttahöllinni á Akureyri. „Mjög takmarkað magn af miðum í boði, fyrstur kemur, fyrstur fær,“ segir í auglýsingu Þórs.
Önnur miðasala hjá KA á morgun
KA hóf miðasölu í gær til sinna stuðningsmanna og fór hún afar vel af stað að sögn Ágústs Stefánssonar. „Meira en helmingur okkar miða er seldur. Við verðum með aðra sölu á morgun [föstudag] á milli 15 og 17,“ sagði Ágúst enn fremur.
KA og Þór mættust síðast í Olísdeild karla 27. maí 2021 og skildu þá jöfn, 19:19, í KA-heimilinu. Fyrri viðureignin það tímabil fór fram á heimavelli Þórs í Íþróttahöllinni á Akureyri. KA-menn fóru kátir heim eftir tveggja marka sigur.
