Í morgun var opinberað að Matthildur Lilja Jónsdóttir, liðlega tvítugur leikmaður ÍR, verður í landsliðshópnum sem tekur þátt í heimsmeistaramótinu sem hefst í næstu viku. Matthildur Lilja hefur ekki áður tekið þátt í stórmóti A-landsliða. Hún segist óvænt verða að hugsa dagskrá næstu vikna upp á nýtt, stokka upp spilin, því samhliða óvæntri þátttöku á HM standi fyrir dyrum fjögur próf í háskólanum en Matthildur Lilja er á öðru ári í hjúkrunarfræði.
„Ég er ótrúlega glöð að hafa verið kölluð inn í hópinn. Ég var látin vita á föstudaginn að þetta stæði fyrir dyrum. Þetta voru ótrúlega góðar fréttir um helgina,“ sagði Matthildur Lilja þegar handbolti.is hitti hana stuttlega að máli fyrir fyrstu æfingu landsliðsins í Safamýri í kvöld.
„Ég er að fara í fjögur lokapróf sem verða á dagskrá meðan ég verð með landsliðinu. Ég verð að reyna að taka þau á meðan ég verð úti í Þýskalandi. Ég var að vinna í þessum málum í dag en hef ekki leyst þau ennþá,“ sagði Matthildur Lilja sem er staðráðin í að láta prófin ekki stöðva sig frá því að vera hluti af íslenska landsliðinu á heimsmeistaramótinu.
Fyrst og fremst heiður
„Fyrst og fremst er það mikill heiður að fá tækifæri til þess að taka þátt í HM og vera hluti af þessum hóp og fara á fyrsta stórmótið,“ sagði Matthildur Lilja Jónsdóttir eldhress og spennt þegar handbolti.is hitti hana að máli.
Lengra viðtal við Matthildi Lilju er í myndskeiði hér fyrir ofan.
Sjá einnig: Matthildur Lilja bætist við HM-hópinn
HM-hópur Íslands:
Markverðir:
Hafdís Renötudóttir, Valur (70/4).
Sara Sif Helgadóttir, Haukar (14/0).
Aðrir leikmenn:
Alfa Brá Oddsdóttir Hagalín, Fram (9/8).
Andrea Jacobsen, HSG Blomberg-Lippe (66/116).
Dana Björg Guðmundsdóttir, Volda (12/25).
Díana Dögg Magnúsdóttir, HSG Blomberg-Lippe (65/88).
Elín Klara Þorkelsdóttir, IK Sävehof (26/90).
Elín Rósa Magnúsdóttir, HSG Blomberg-Lippe (31/59).
Elísa Elíasdóttir, Valur (24/19).
Katrín Anna Ásmundsdóttir, Fram (12/25).
Katrín Tinna Jensdóttir, ÍR (27/17).
Lovísa Thompson, Valur (30/66).
Matthildur Lilja Jónsdóttir, ÍR, (1/0).
Rakel Oddný Guðmundsdóttir, Haukar (3/2).
Sandra Erlingsdóttir, ÍBV (38/155).
Thea Imani Sturludóttir, Valur (91/197).
Þórey Anna Ásgeirsdóttir, Valur (47/68).
Landsliðsþjálfari: Arnar Pétursson.
Aðstoðarþjálfari: Óskar Bjarni Óskarsson.
Markvarðaþjálfari: Hlynur Morthens.
Styrktarþjálfari: Hjörtur Hinriksson.
Sjúkraþjálfarar: Tinna Jökulsdóttir og Jóhanna Björk Gylfadóttir.
Liðsstjóri: Þorbjörg Jóhanna Gunnarsdóttir.
Leikir Íslands í riðlakeppni HM kvenna:
26. nóvember: Þýskaland - Ísland, kl. 17.
28. nóvember: Ísland - Serbía, kl. 19.30.
30. nóvember: Ísland - Úrúgvæ, kl. 14.30.
- Leikirnir fara fram í Porsche-Arena, Stuttgart.
- Leiktímar að ofan eru miðaðir við Ísland.
- Þrjú lið fara áfram í milliriðla.
- Neðsta liðið fer í keppnina um forsetabikarinn.
- Blaðamaður og ljósmyndari frá handbolti.is fylgir landsliðinu eftir á HM.
