„Ég hef verið til taks á síðustu mótum landsliðsins en núna fæ ég að vera með og verð í hlutverki. Ég er bara spennt fyrir komandi dögum,“ segir Sara Sif Helgadóttir, annar markvörður íslenska landsliðsins sem tekur þátt í heimsmeistaramótinu. Handbolti.is hitti Söru Sif stuttlega að máli á hóteli landsliðsins í Stuttgart í gærkvöld.
Sara Sif hefur um árabil verið ein af betri markvörðum Olísdeildar og leikið m.a. með Val, Fram, HK, Fjölni og nú er hún á öðru keppnistímabili með bikarmeisturum Hauka. Einnig hefur Sara Sif verið með annan fótinn í landsliðinu og leikið alls 15 landsleiki. Hún var hinn augljósasti kostur til að mynda markvarðapar landsliðsins á HM með gömlum samherja úr Val, Hafdísi Renötudóttur, þegar Elín Jóna Þorsteinsdóttir er í barnsburðarleyfi.
„Það hefur verið mikil samkeppni um markvarðastöðuna. Elín og Hafdís eru frábærar. Ég hef verið tilbúin að bakka þær upp þegar þörf hefur verið á,“ segir Sara Sif sem, eins og margar af leikmönnum landsliðsins um þessar mundir, er að taka þátt í stórmóti A-landsliða í fyrsta skipti.
„Alþjóðleg reynsla mín hefur aukist á síðustu árum, bæði með landsliðinu og félagsliðum. Ég er til dæmis nýkomin úr Evrópuleikjum með Haukum,“ segir Sara Sif sem hlakkar til komandi daga.
„Byrjunin á mótinu verður krefjandi fyrir okkur,“ segir Sara Sif og vísar til leikjanna við Þýskaland á morgun og við Serba á föstudaginn. „Við gerum okkur grein fyrir hvar við stöndum. Við ætlum að halda í gleðina og ánægjuna, koma um leið af miklum krafti inn. Það verður fullt hús og stemning á fyrsta leiknum við Þjóðverja,“ segir Sara Sif Helgadóttir markvörður íslenska landsliðsins á HM sem hefst á morgun, miðvikudag.
Lengra myndskeiðsviðtal við Söru Sif er að finna í myndskeiði hér fyrir odan.
Fleira efni:
HM kvenna ”25 – dagskrá, riðlakeppni
Landslið Íslands á HM kvenna 2025
A-landslið kvenna – fréttasíða.
