Íslenska landsliðið í handknattleik kvenna æfði í Porsche Arena í Stuttgart í dag, rúmum sólarhring áður en liðið mætir þýska landsliðinu í upphafsleik heimsmeistramóts kvenna í handknattleik á morgun klukkan 17.
Uppselt er á leikinn, 6 þúsund áhorfendur verða í þessari glæsilegu keppnishöll í Stuttgart. Reikna má með rífandi góðri stemningu á viðureigninni.
Farið var rækilega yfir helstu áherslur Arnars Péturssonar á æfingunni í dag sem stóð yfir á annan tíma. Léttur og skemmtilegur andi sveif yfir vötnum í landsliðshópnum en ljóst er einnig að spenna og eftirvænting svifur yfir vötnum enda margar úr landsliðshópnum lítt- eða óreyndar af þátttöku á stórmóti, hvað þá að leika fyrir framan sex þúsund áhorfendur.
Hafliði Breiðfjörð ljósmyndari myndar fyrir handbolta.is á HM kvenna. Hann mætti með myndavélar sínar á æfinguna. Hluti þeirra mynda birtast hér fyrir neðan.
