„Mér fannst þetta grátlegt. Við spiluðum frábærlega, sérstaklega í síðari hálfleik,“ sagði Hafdís Renötudóttir markvörður sem varði frábærlega í síðari hálfleik og lagði sitt lóð á vogarskálar íslenska landsliðsins þegar það hafði nærri unnið upp sjö marka forskot Serba og tryggt sér jafntefli á síðustu sekúndum viðureignar liðanna á HM kvenna í handknattleik í kvöld. Niðurstaðan varð eins marks tap, 27:26.
„Ég er virkilega svekkt að hafa ekki náð jafntefli eða jafnvel sigri. Niðurstaðan er engum að kenna en persónulega hefði ég viljað fá meiri markvörslu í fyrri hálfleik,“ sagði Hafdís sem valin var leikmaður leiksins fyrir stórleik sinn í síðari hálfleik.
„Við erum ógeðlega góðar og ég get ekki beðið eftir framtíðinni með þessum stelpum,“ sagði Hafdís sem verður næst í eldlínunni á sunnudaginn þegar íslenska landsliðið leikur úrslitaleik við Úrúgvæ um sæti í milliriðlakeppni heimsmeistaramótsins.
Lengra viðtal við Hafdísi er í myndskeiði hér rétt fyrir ofan.
