„Það myndaðist vökvi á kálfanum í leiknum heima og liðslæknirinn sagði að það væri of mikil áhætta að taka að vera með í leiknum í kvöld,“ sagði Bjarki Már Elísson hornamaður þýska liðsins Lemgo og landsliðsmaður í handknattleik við handbolta.is fyrir stundu.
Bjarki Már situr yfir í kvöld þegar Lemgo mætir Íslandsmeisturum Vals í síðari viðureign liðanna í 2. umferð Evrópudeildarinnar í handknattleik karla í Phoenix Contact Arena í Lemgo.
„Læknirinn heldur því fram að það sé betra að fá þetta burt strax og vera frá í nokkra daga en að spila núna og mögulega rífa þetta alveg og vera þá frá í um sex vikur. Þannig að maður bara hlýðir,“ sagði Bjarki Már sem fór á kostum í fyrri leiknum við Val, skoraði níu mörk í níu tilraunum og var markahæsti leikmaður Lemgo.
„Ég hefði spilað bara með vafinn kálfann en kannski sem betur fer ræður maður ekki alltaf sjálfur,“ sagði Bjarki Már sem verður að gera sér að góðu að vera á meðal áhorfenda í Phoenix Contact Arena í Lemgo.
Lemgo vann fyrri viðureignina við Val með eins marks mun, 27:26.
