„Það var geggjað að taka þátt. Þetta var sturlaður leikur sem ég er ótrúlega þakklát fyrir að hafa fengið tækifæri til þess að taka þátt í,“ segir Elísa Elíasdóttir sem lék sinn fyrsta leik á HM 2025 gegn Serbíu í tapinu nauma, 27:26.
Þakkar sjúkraþjálfurunum
Elísa hafði ekki jafnað sig nægilega vel í annarri öxlinni eftir meiðsli þegar leikið var við Þýskaland en hefur náð sér nægilega vel til þess að eiga þess kost að vera með í gær. Elísa þakkar batann ekki síst öflugum sjúkraþjálfurum kvennalandsliðsins, Jóhönnu Björk Gylfadóttur og Tinnu Jökulsdóttur sem hafa unnið með kvennalandsliðinu um árabil og eru hoknar af reynslu.
„Það er ógeðslega gaman að spila svona leiki þar sem er barátta alls staðar á vellinum,“ segir Eyjamærin sem er að taka þátt í sínu öðru heimsmeistaramóti með landsliðinu. Elísa var einnig með á HM 2023 í Noregi og Danmörku.
„Það munaði alltof litlu undir lokin en ég er ótrúlega stolt af liðinu og hvernig okkur tókst að snúa leiknum við í síðari hálfleik. Ég hef aldrei séð okkur spila eins vel og við gerðum í seinni hálfleik gegn Serbum,“ sagði Elísa og undirstrikaði að frammistaðan sýndi best þá samstöðu og gleði sem ríkti innan landsliðshópsins.
Lengra viðtal við Elísu er að finna í myndskeiði hér fyrir ofan.
A-landslið kvenna – fréttasíða.
HM kvenna ”25 – dagskrá, riðlakeppni, úrslit
Landslið Íslands á HM kvenna 2025
