Kristján Örn Kristjánsson, Donni, og liðsfélagar í Skanderborg voru nærri því að verða fyrstir til þess að vinna stig af Danmerkurmeisturum Aalborg Håndbold á leiktíðinni er þeir töpuðu með eins marks mun, 27:26, á heimavelli í dag í hörkuleik sem var hnífjafn frá upphafi til enda.
Donni skoraði sjö mörk í níu skotum og var markahæstur leikmanna Skanderborg. Magnus Petersen markvörður Skanderborg varði 16 skot, 39%.
Marinus Munk skoraði sex mörk fyrir Aalborg. Niklas Landin varði 14 skot, 37%.
Skanderborg er í fjórða sæti með 16 stig að loknum 14 leikjum. Aalborg er efst með 28 stig.
Ísak með fullkomna nýtingu
Ísak Gústafsson lék prýðilega fyrir TMS Ringsted er liðið vann Grindsted í botnbaráttu dönsku úrvalsdeildarinnar í dag á heimavelli, 35:31. Selfyssingurinn skoraði sex mörk í sex skotum en félagar hans Rasmus Graffe og Oliver Wosniak skoruðu 10 mörk hvor.
Guðmundur Bragi Ástþórsson skoraði eitt mark fyrir Ringsted-liðið sem var þremur mörkum undir í hálfleik, 16:13. Ringsted-menn tóku sig saman í andlitinu í síðari hálfleik og skoruðu 22 mörk.
Ringsted er næst neðst í deildinni, 13. sæti, með níu stig eftir 14 leiki Grindsted rekur lestina með þrjú stig.
Elvar Ásgeirsson skoraði þrjú mörk í fimm skotum og gaf tvær stoðsendingar í naumu tapi Ribe-Esbjerg fyrir SønderjyskE, 38:37. Ribe-Esbjerg er í 9. sæti með 11 stig.
Staðan:
