ÍR-ingar unnu loksins leik í Olísdeildinni í kvöld þegar þeir lögðu Þórsara, 34:31, í síðasta leik 12. umferðar í Skógarseli. Sigurinn var afar sannfærandi því ÍR-liðið var með yfirhöndina frá upphafi til enda. Í hálfleik var forskot ÍR-inga fimm mörk, 18:13. Liðið hefur þar með fimm stig, og er tveimur stigum á eftir Selfoss og Þór sem eru tveimur sætum fyrir ofan.
Þórsarar hafa aðeins unnið eitt stig í síðustu fjórum leikjum.
Eins og áður segir voru ÍR-ingar með yfirhöndina frá upphafi til enda. Þórsurum tókst að minnka muninn í eitt mark þremur mínútum fyrir leikslok, 30:29, enda þekktir fyrir að lifna verulega við á endakafla leikjanna. Nær komust þeir ekki.
Miklu munaði að Ólafur Rafn Gíslason markvörður ÍR var vel með á nótunum en daufara var yfir markvörðum Þórs.
Línumenn Þórs, Kári Kristjánsson og Þórður Tandri Ágústsson, voru atkvæðamestir í sóknarleiknum.
Baldur Fritz Bjarnason og Jökull Blöndal Björnsson skoruðu átta mörk hvor fyrir ÍR. Sveinn Brynjar Agnarsson stóð sig einnig vel í hægra horninu og skoraði sjö mörk.
Næsti leikur ÍR verður við Selfoss í Sethöllinni 3. desember. Þórsarar mæta Fram í Höllinni á Akureyri þremur dögum síðar.
Mörk ÍR: Baldur Fritz Bjarnason 8, Jökull Blöndal Björnsson 8, Sveinn Brynjar Agnarsson 7, Bernard Kristján Owusu Darkoh 5, Bjarki Steinn Þórisson 2, Elvar Otri Hjálmarsson 2, Eyþór Ari Waage 1, Róbert Snær Örvarsson 1.
Varin skot: Ólafur Rafn Gíslason 16, Alexander Ásgrímsson 1.
Mörk Þórs: Kári Kristján Kristjánsson 9, Þórður Tandri Ágústsson 6, Brynjar Hólm Grétarsson 5, Hafþór Már Vignisson 3, Oddur Gretarsson 3, Þormar Sigurðsson 3, Hákon Ingi Halldórsson 2.
Varin skot: Nikola Radovanovic 7, Patrekur Guðni Þorbergsson 4.
Tölfræði leiksins.
Staðan og næstu leikir í Olísdeildum.
