„Það er gaman fyrir okkur að fara í leik á HM þar sem við eigum að vera sterkara liðið. Hins vegar má ekki gleyma því að leikmenn Úrúgvæ kunna alveg handbolta og við verðum að búa okkur vel undir leikinn,“ segir Sandra Erlingsdóttir fyrirliði íslenska landsliðsins í samtali við handbolta.is um viðureign dagsins, Ísland – Úrúgvæ, í lokaumferð C-riðils í Porsche Arena í Stuttgart. Flautað verður til leiks klukkan 14.30 að íslenskum tíma.
Sigurliðið í viðureign Íslands og Úrúgvæ öðlast sæti í milliriðlakeppni HM sem fram fer í Dortmund og mætir væntanlega landsliðum Færeyja, Spánar og Svartfjallalands á þriðjudag, fimmtudag og laugardag. Tapliðið fer til Hollands þar sem átta landslið berjast um forsetabikarinn og sæti 25 til 32.
Sandra segir að það geti verið snúið að mæta andstæðingi sem leikur oft óhefðbundinn handknattleik. Tvö ár eru síðan íslenska landsliðið mætti Paragvæ á HM í Danmörku og vann með sex marka mun, 25:19.
„Við verðum að búa okkur vel undir leikinn við Úrúgvæ. Hingað til höfum við sýnt að við eigum fyllilega skilið að vera með á HM. Nú er komið að því að stíga næsta skref og sjá hvert það leiðir okkur,“ segir Sandra Erlingsdóttir fyrirliði íslenska landsliðsins í handknattleik.
Lengra viðtal við Söndru er í myndskeiði hér fyrir ofan.
A-landslið kvenna – fréttasíða.
HM kvenna ”25 – dagskrá, riðlakeppni, úrslit
Landslið Íslands á HM kvenna 2025
